Акафист преподобноисповеднице Фамари (Марджановой)

Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Кондак 1

Избранная Христова угоднице, любовию Божественною от юности уязвленная и красотою нетленною озаренная, наставнице инокинь доблемудрая и людем благая утешительнице, венцем исповедничества светло увенчанная, восхваляем тя, заступнице наша пред Богом и молитвеннице: Радуйся, преподобная мати Фамарь, исповеднице Господня.

Икос 1

Ангельское житие от юности избравшая, славу земную отвергшая, яко скорогибнующую, столп смирения обрелася еси. Чистоты и целомудрия сосуде, во плоти аки бесплотна поживши, обитель святую по повелению Царицы Небесныя премудро устроила еси. Такожде исповеданием веры и страданьми за Христа житие твое запечатлела еси, преподобная мати Фамарь. Мы же соплетаем ти венец похвалы:

Радуйся, благородныя лозы отрасль благословенная;

Радуйся, многия плоды духовныя израстившая.

Радуйся, многоценными нитями добродетелей одеяние души соткавшая;

Радуйся, в златовидныя ризы праведности облеченная.

Радуйся, в лице святых предстоящая престолу Царя Славы;

Радуйся, невесто Христова, со Ангельскими чинми ликующая.

Радуйся, ластовице благоглаголивая, нектаром небесным напаяемая;

Радуйся, источниче целебный, верныя услаждаяй;

Радуйся, адаманте многоценный, сияяй в лучах Солнца Правды Христа;

Радуйся, Господа не отвергшаяся пред человеки;

Радуйся, звездо, Христом возжженная, и каменю крепкий Церкве Его;

Радуйся, великая в женах избраннице Божия.

Радуйся, преподобная мати Фамарь, исповеднице Господня.

Кондак 2

Видящи любовь твою святую к Небесному Жениху Христу, страдания крестная и смерть за род человеческий претерпевшему, и житие твое досточудное, преподобная мати Фамарь, умиляемся сердцами: ты бо немощь естества ни во чтоже вменила еси, стопам Спасителя последующи, Той же управи ладию твою в пристань Божественную. Темже величаем прославльшаго тя Господа и поем Ему: Аллилуия.

Икос 2

Разум богопросвещенный имущи, преподобная мати Фамарь, благую часть избрала еси и к шествию путем Господним устремилася еси, благодатию Божиею призванная: притекши бо во обитель Бодбийскую, святей равноапостольной Нине, просветительнице Иверии, посвященную, труды ко трудом прилагала еси, в подвизех духовных возрастающи, таже сподобися чина ангельскаго, в постризе монашестем имя святителя Христова Иувеналия восприемши. Темже тя хвалим достойно:

Радуйся, в молитве сокровенной пребывавшая;

Радуйся, Творцу Неба и земли хвалу выну возсылавшая.

Радуйся, тленности греховныя ветхаго человека совлекшаяся;

Радуйся, о благочестии крепце подвизавшаяся.

Радуйся, любовию Божиею уязвленная и ею очищенная;

Радуйся, мужеством и целомудрием украшенная.

Радуйся, постом, бдением и молитвою страсти умертвившая;

Радуйся, смирением гордыню князя тьмы низложившая.

Радуйся, в монастыре святой Нины духовне возраставшая;

Радуйся от лозы тоя благодатне напитанная.

Радуйся, смоковнице плодородная дома Божия;

Радуйся, миро благоуханное и многоценное.

Радуйся, преподобная мати Фамарь, исповеднице Господня.

Кондак 3

Силу духовную прозревая в тебе, святый пастырь Иоанн Кронштадтский сугубаго благословения тя сподоби, такожде игуменство в триех обителех и великую схиму тебе предрече. Егда же поставлена была еси в настоятельницу обители Бодбийския, паки и паки духовне помогаше ти, наставляя и утешая. Ты же, благодатию укрепляема, вся бремена, Десницею Господнею тебе низпосланная, со благодарением смиренно понесла еси и яко светило возсияла еси миру светом добродетелей, поющи Богу: Аллилуия.

Икос 3.

Имея любовь велию к преподобному Саровскому старцу Серафиму, во вся дни жития твоего помощи его благодатныя сподоблялася еси. Егда же обрела еси образ преподобнаго, в день всечестнаго во святых старца Серафима прославления на мощех его освященный, чудеса многа, чрез образ сей источаемая, узрела еси и спасена бысть от злобы людей беззаконных. Мы же, ныне прославляюще тя и заступления твоего взыскующе, со умилением вопием ти:

Радуйся, приемшая от Господа благодать пасти словесное стадо Христово;

Радуйся, настоятельнице достойная собора дев.

Радуйся, постом душепитательным насыщенная;

Радуйся, плотское мудрование отринувшая.

Радуйся, Христом укрепляемая, иноческим подвигом себе предавшая;

Радуйся, житие подвижническое провождавшая.

Радуйся, семя слова Божия душею восприемшая;

Радуйся, слезами покаяния ниву сердечную орошавшая.

Радуйся, плод блаженства вечнаго обретшая;

Радуйся, чистая, Богу чистому предстоявшая.

Радуйся, молитве сердечней научающая;

Радуйся, на стези спасения нас направляющая.

Радуйся, преподобная мати Фамарь, исповеднице Господня.

Кондак 4

Бури треволнений и напастей, от врага рода человеча чрез злых человек воздвизаемых, не поколебаша упования твоего, преподобная мати Фамарь, на Христа Спасителя, присно о верных Своих ко благу промышляющаго, Емуже воспевала еси во вся дни жизни твоея: Аллилуия.

Икос 4

Слышавше начальствующии архипастырие о нападении человек беззаконных, еже претерпела еси, преподобная мати Фамарь, благословиша тя на служение новое и поставиша тя во граде Москве начальницею общины сестер милосердия, Покрову Пресвятыя Богородицы посвященныя; и тако прият тя Матерь Божия под кров обители Своея, к служению будущему уготовляющи. Мы же со благоговением вопием ти сицевая:

Радуйся, чадо послушания, Промыслу Божию последующая;

Радуйся, со смирением вся низпосылаемая тебе приимавшая.

Радуйся, благовестием Евангельским душу питавшая;

Радуйся паче меда словом Божиим уста услаждавшая.

Радуйся, в душеполезном богомыслии упражнявшаяся;

Радуйся, зерцало непорочное богоугодных помыслов сердечных.

Радуйся, покаяния спасительным сиянием озаренная;

Радуйся, дух сокрушенный Богу приносившая.

Радуйся, сердце свое в Бозе утвердившая;

Радуйся, сокровище неоскудеваемое на Небесех собравшая.

Радуйся, агнице златорунная стада Христова;

Радуйся, в Небесную ограду внити удостоенная.

Радуйся, преподобная мати Фамарь, исповеднице Господня.

Кондак 5

Божественною ревностию окриляема, преподобная мати Фамарь, благое уединение улучити тщащися, восхотела еси удалитися в Скит обители Серафимо-Понетаевския, да скончаваеши дни твоя в тишине молитвы неразвлекаемыя близ любимаго тобою угодника Божия Серафима. Обаче возбрани тебе сие Царица Небесная, повелевающи тебе устроительницею обители новыя быти, идеже воспевати имаши выну Господу: Аллилуия.

Икос 5

Видящи, мати преподобная, яко несть воли Божия еже сбытися сердечному желанию твоему, со страхом и трепетом приступи к созиданию Скита в честь Иконы Богородицы Знамения и преподобнаго Серафима, чудотворца Саровскаго, благословением старца Алексия Зосимовскаго и старцев Оптинских укрепляемая. Промышлением же Царицы Небесныя вся потребная делу сему пречудно устроишася. Мы же, ужасающеся таковым преславным чудесем, благодарственно вопием ти:

Радуйся, премудрости Божия вместилище;

Радуйся, Животворящаго Духа Святаго жилище.

Радуйся, добротою души твоея Господеви угодившая;

Радуйся, Матере Божия послушнице усердная.

Радуйся, на высоту Божественнаго познания восшедшая;

Радуйся, словес евангельских подражательнице.

Радуйся, пути своя в законе Господни исправлявшая;

Радуйся, в заповедех Господних поучавшаяся.

Радуйся, луно смирения в нощи гордости житейския;

Радуйся, терпения лучезарный образе.

Радуйся, кроткаго и молчаливаго духа неистленную красоту явившая;

Радуйся, крине райский, благоуханием своим Церковь Святую исполнивший.

Радуйся, преподобная мати Фамарь, исповеднице Господня.

Кондак 6

Проповедница жития евангельскаго явилася еси, преподобная мати, егда обитель чудную по благословению Царицы Небесныя устроивши, сестер, тебе врученных, и всех приходящих к тебе прилежне научала еси добродетелем и следованию неуклонному за Христом Спасителем, поющи Ему: Аллилуия.

Икос 6

Возсия дивно свеща молитвы иноческия в Скиту Серафимо-Знаменстем, идеже в мире благодатнем и взаимней любви сестры, Христу Сладчайшему Жениху своему жизнь посвятившия, от силы в силу восхождаху на гору добродетелей. Ты же, преподобная мати Фамарь, премудро чад своих духовных ко спасению управляла еси. Мы же молим тя, одожди на нас капли любве твоея и приими песнь сию:

Радуйся, обитель монашескую благословением Пречистыя Девы устроившая;

Радуйся, благодати блистанием на подвиги духовныя воодушевлявшая.

Радуйся, златословесною мудростию, аки венцем царским, увенчанная;

Радуйся, разум, светом божественным просвещенный, имевшая.

Радуйся, от красоты земныя к горней красоте ум возводившая;

Радуйся, премудрость Создателя в творении созерцавшая.

Радуйся, дуновений хладных греха убегавшая;

Радуйся, дыханием молитвы душу согревавшая.

Радуйся, слезами умиления мук вечных убежавшая;

Радуйся, над страстьми мира сего возвысившаяся.

Радуйся, радости Божественныя тишины исполненная;

Радуйся, oт бурь мира сего в пристанище Божие приводящая.

Радуйся, преподобная мати Фамарь, исповеднице Господня.

Кондак 7

Хотящи, да вся духовному возрастанию споспешествуют, тако устроила еси премудро, да чрез образы земныя и уставы, сестры обители твоея к горнему ум обращают, токмо о нетленнем помышляюще и с мудрыми девами евангельскими Жениху Небесному воспевающе песнь хвалы: Аллилуия.

Икос 7

Новое чудо Промысла Божия над тобою явися, егда пострижение в великую схиму прияла еси, сугубую любовь ко Сладчайшему Христу Спасителю являющи, послушание же игуменское тебе оставлено бысть по неизреченному смотрению Божественному. Наречена же бысть именем сестры Господни Фамари мироносицы, ейже подражающи, во вся дни жития твоего за Учителем следовала еси. Темже и нас грешных научи любви нелицемерней ко Господу, мы же единем сердцем и усты вопием ти:

Радуйся, яко елень на источники водныя ко Христу Спасителю стремившаяся;

Радуйся, в литургии Божественней источник жизни обретавшая.

Радуйся, по приятии схимы Святых Христовых Таин по вся дни приобщавшаяся;

Радуйся, Трапезою Господнею душу насыщавшая.

Радуйся, яко един Господь бысть желание и сладость жизни твоея;

Радуйся, Небеснаго Хлеба и Чаши спасения алкавшая.

Радуйся, пред образом Богородицы Покрывающия молитвы теплыя изливавшая;

Радуйся, почитанию иконы сея споспешествующая.

Радуйся, Покрову Владычицы Девы духовных чад твоих вверявшая;

Радуйся, ко причастию Тайныя Вечери их побуждавшая.

Радуйся, ангельским силам на земли подражавшая;

Радуйся, цвете благоуханный вертограда Христова.

Радуйся, преподобная мати Фамарь, исповеднице Господня.

Кондак 8

Странница на земли была еси, преподобноисповеднице мати Фамарь, и егда обитель твоя святая, тихое пристанище ищущим спасения, от людей безбожных разорена бысть, николиже возроптала еси, но в сердце своем обитель Духу Святому сотворивши, присно взывала Ему: Аллилуия.

Икос 8

Вся любовию Христовою огнепалима, мати Фамарь доблемудрая, выну в молитве пребывала еси. Аще и разорена бысть обитель видимая, обаче не возможе враг разорити обители сердца твоего. Паки ты общину малую сестер собрала еси, еже подвижническое житие с ними вкупе проводити. И тако устроися жительство ваше, аки прежде в Скиту, злобою демонскою отъятом. Явишася же многомудрая беседа твоя и теплая молитва утешение людем многим во дни тыя скорбныя. Темже призри и на ны, тако тя величающия:

Радуйся, божественною ревностию пламеневшая;

Радуйся, прещений злых человек не убоявшаяся.

Радуйся, огнь скорбей пламенем любве ко Господу укротившая;

Радуйся, аки злато, огнем очищенное, паче просиявшая.

Радуйся, божественныя радости страданием причастная;

Радуйся, блаженство праведных унаследовавшая.

Радуйся, души отчаявшияся надеждою исполнявшая;

Радуйся, в уповании на Бога и вере укреплявшая.

Радуйся, ангелом утешения во времена тяжкая людем скорбящим явившаяся;

Радуйся, от сокровищ душевных щедро ближним расточавшая.

Радуйся, бисером добродетелей украшавшаяся;

Радуйся, дарований духовных сподобльшаяся.

Радуйся, преподобная мати Фамарь, исповеднице Господня.

Кондак 9

Всякое земное попечение отложивши, всецело жизнь твою в руце Божии предала еси, преподобная мати Фамарь, и крест исповедничества со смирением понесла еси, от человек безбожных страдания и гонения претерпевающи. И егда бури обстояний и треволнений скорбных погружаху тя, присно Творцу воспевала еси: Аллилуия.

Икос 9

Ветии многовещании не возмогут изрещи красоту души твоея, преподобная мати Фамарь: егда бо в темницу заключена бысть, николиже возроптала еси, выну в молитве сердечней пребывающи. Темже и самыя судии беззаконии и стражие темничнии уловлени быша величием духа твоего. Буди же нам заступница в многомятежном мире сем, поющим ти:

Радуйся, безбожное лукавство и лесть отвергшая;

Радуйся, ложная мудрования мира сего обличившая.

Радуйся, чашу страданий за имя Христово испившая;

Радуйся, венец победный в Иерусалиме Небеснем приемшая.

Радуйся, на Крест Господень взирающи, в терпении Христу подражавшая;

Радуйся, спасительное имя Иисусово в сердце молитвою начертавшая.

Радуйся, нощь печалей лучами благодарения просвещавшая;

Радуйся, из темницы хвалу Господу бодрственно возносившая.

Радуйся, светильник души боголюбивыя ярко возжегшая;

Радуйся, елеем благодатным милосердия его наполнившая.

Радуйся, лампадо любве присногорящая во мраце злобы и беззакония;

Радуйся, в ризы светлыя веры и надежды облаченная.

Радуйся, преподобная мати Фамарь, исповеднице Господня.

Кондак 10

Спасения во Христе всем чающи и всякой души сострадающи, никогоже отринула еси. Но блудницам и татем, в темнице вкупе с тобою томящимся, утешительница и наставница ко благочестию бывши, свет Христов явила еси во тьме греха и беззакония, ко Господу присно взывающи: Аллилуия.

Икос 10

Стена нерушимая, спасения утвержение и утешение в печалех бысть тебе Пресвятая Богородица, Ейже во вся дни жития твоего служила еси, преподобная мати Фамарь. Испроси и нам, недостойным, покров и заступление Царицы Небесныя, научи выну угодное Ей творити и молитися со умилением. Мы же славим тя присно:

Радуйся, во Уделе Богородицы взращенная;

Радуйся, под Кров Ея в бури скорбей притекавшая.

Радуйся, из реки милости Владычицы Девы напоенная;

Радуйся, тем горечь скорбную услаждавшая.

Радуйся, оружием Христовым вооружившаяся;

Радуйся, щитом благочестия покрываемая.

Радуйся, греховными волнами потопляемых от погибели спасавшая;

Радуйся, души падшия к покаянию пробуждавшая.

Радуйся, яко словеса твоя быша аки роса благодатная;

Радуйся, небесною прохладою в знои скорбей сердца орошавшая.

Радуйся, любве ради бремена ближних носившая;

Радуйся, Христу подражающи, никогоже отринувшая.

Радуйся, преподобная мати Фамарь, исповеднице Господня.

Кондак 11

Пение непрестанное Творцу возносила еси, егда на изгнание во страну Сибирскую неправедно осуждена была еси. И внегда напастей облацы покрываху сердце твое, притекала еси к приснотекущему источнику милости – Пресвятей Богородице, свет благодатныя радости почерпающи. Во стране Сибирстей глад и мраз претерпевающи, со благодарением взывала еси к Создателю, вся к пользе Своего творения промышляющаго: Аллилуия.

Икос 11

Светоприемную свещу молитвы неугасиму держащи, егда смотрением Божиим изгнание твое прекращено бысть, паки к общине сестер возвратилася еси, в житии монашестем руководствующи чад твоих. Крест болезни тяжкия со смирением приемши, на высоту любве Христовы возшла еси. Темже молим тя: уврачуй душ и телес наших раны, о мати наша, да с любовию воспоем ти:

Радуйся, страну хладную теплотою веры согревшая;

Радуйся, розо благоуханная, край суровый украсившая.

Радуйся, в нощи и во дни имя Божие призывавшая;

Радуйся, в полунощи Жениха Сладчайшаго воспевавшая.

Радуйся, аки дева мудрая, к сретению Спасителя себе приуготовлявшая;

Радуйся, в Чертог Божественный славы Христовы восшедшая.

Радуйся, мир Христов неизреченный в сердце стяжавшая;

Радуйся, одеяние нетления от Господа получившая.

Радуйся, живою водою благодати сердца страждущая исцелявшая;

Радуйся, звездо путеводная гонимых чад твоих.

Радуйся, надеждо всех утешения чающих;

Радуйся, совершенством любве вся объемлющая;

Радуйся, преподобная мати Фамарь, исповеднице Господня.

Кондак 12

Благодать пред Богом обретши, в меру исполнения возраста Христова достигла еси, подвигом добрым подвизавшися, течение земное совершила еси, и тако наста время отшествия твоего в небесныя обители возлюбленнаго Жениха Твоего, идеже уготовася тебе венец правды. И тако предала еси дух твой в руце Божии и преселилася еси в Горняя селения, еже воспевати тамо вкупе со ангельскими лики Творцу: Аллилуия.

Икос 12

Поюще прославление твое, преподобная мати наша, и лобызающе святыя мощи твоя, благодарим и молим тя: буди заступница сестрам обители твоея и вся ны руководствуй ко спасению. С горних высот призри на ны и научи токмо о едином на потребу помышляти и небесною красотою ум пленяти, тако тя величающих:

Радуйся, паче злата и топазия Творца возлюбившая;

Радуйся, совершения духовнаго достигшая.

Радуйся, аки голубица чистая к небесем возлетевшая;

Радуйся, на земли подвиг подъемшая и в радость Господа твоего вшедшая.

Радуйся, горлице пустыннолюбивая, в чертозех Небесных превитающая;

Радуйся, ныне в блистании Света Незаходимаго обретающаяся.

Радуйся, святыя мощи твоя во утешение нам даровавшая;

Радуйся, исцеления просящим подающая.

Радуйся, Иверии благословенныя лозо многоплодная,

Радуйся, звездо светлая в созвездии святых Церкве Русския.

Радуйся, предстательство теплое тя почитающим;

Радуйся, обители Серафимо-Знаменския украшение.

Радуйся, преподобная мати Фамарь, исповеднице Господня.

Кондак 13

О, преподобная мати наша Фамарь, невесто Христова избранная, светом нетленным просвещенная, исповеднице веры во времена тяжкая богоотступления, молитвеннице теплая, утешительнице наша и наставнице. Приими сие малое моление наше и сподоби нас житие земное добре преити и блаженство вечное улучити, да во веки веков с тобою воспеваем Господу: Аллилуия.

Сей конда́к глаго́лется три́жды. И па́ки чте́тся и́кос 1-й, и конда́к 1-й.

Молитва

О, святая преподобная исповеднице мати Фамаре, в непорочности телесе, души и духа Господу угодившая и пресветлому Лику Его предстоящая! Приими молитвы наша и вознеси я ко Престолу Вседержителя, яко мати наша и, по Богородице, честная ходатаица! Светлейшее имя Господа Иисуса Христа на скрижалех сердца твоего носившая, научи нас бдению и трезвению, да никакоже отлучимся Спасителя нашего. В пощениих и трудех непрестанных монашескаго жительства пребывшая и спасительное смирение стяжавшая, - вразуми и нас, еже не мнети о себе, но самоукорением отгоняти безместная помышления. Божественную Евхаристию паче пищи тленныя возлюбившая, умоли Архиерея Великаго, Искупителя нашего, да сподобит и нас быти присныя причастники Вечери Тайныя Своея, аще и недостойни есмы. И тако Господеви работающе со страхом и радующеся Ему с трепетом, да прославим делом, словом и помышлением Всесвятую Троицу, Единосущную и Нераздельную, ныне и присно и во веки веков. Аминь.